28/12/2009 - Frétt Flugeldasalan hafinn... Í dag hóf björgunarsveitin Þorbjörn sína árlegu sölu á flugeldum og bjóðum við bæjarbúa velkomna á sölustað okkar í björgunarmiðstöðinni að Seljarbót. 02/11/2009 - Frétt Tryllukarlar styrkja björgunarsveitirnar. Smábátafélagið Reykjanes ákvað á aðalfundi sínum nýverið að styrkja björgunarsveitirnar fimm, sem eru á Reykjanesskaganum, um hálfa milljón. Það þótti vel við hæfi að afhenda styrkina á landsæfingu slysavarnfélaganna sem haldin var á Reykjanesskaganum 24. október sl.   Við það tækifæri ávarpaði Halldór Ármannsson formaður Reykjaness viðstadda.  Hann lét þess getið að þar sem fjárhagsleg staða félagsins væri góð hefði verið ákveðið að styrkja gott málefni.  Slysavarnafélögin voru það fyrsta sem kom í hug manna og tekjur félagsins á einu ári væri ígildi styrkupphæðarinnar. Það kom í hlut Þorláks Halldórssonar gjaldkera Reykjaness að afhenda formönnum félaganna styrkina.  Björgunarsveitirnar þökkuðu höfðinglegt framlag og þann góða hug sem trillukarlar á Reykjanesi sýndu starfi þeirra.  Styrkurinn væri óvænt framlag á erfiðum tímum sem mundi nýtast vel til eflingu slysavarna og björgunarstarfa.   Á myndinni er formaður og gjaldkeri Reykjaness ásamt formönnum Björgunarsveitar Suðurnesja, Sigurvonar í Sandgerði, Þorbjarnar í Grindavík, Skyggni í Vogum og Ægi í Garði.

25/10/2009 - Frétt Landsæfing - 2009 á suðurnesjum Mynd: Vf.is/HBB Landsæfing björgunarsveita var haldin á Suðurnesjum um liðna helgi. Það var Slysavarnarfélagið Landsbjörg, í samstarfi við björgunarsveitir á svæðinu, sem hélt æfinguna að þessu sinni en svona stórar, sameiginlegar æfingar björgunarsveita eru haldnar á tveggja ára fresti. Að þessu sinni tóku um 350 björgunarsveitamenn af öllu landinu auk búnaðar og björgunartækja sem skiptu tugum. Æfingin tókst afar vel og veður lék við þátttakendur sem leystu leitar-, skyndihjálpar-, og fjallabjörgunarverkefni ásamt almennum tækjaverkefnum. Æfingunni lauk síðan á umfangsmiklu rústabjörgunarverkefni. Að verkefnunum komu einnig þyrla Landhelgisgæslunnar, um 60 manns frá björgunarsveitunum á Suðurnesjum og um 70 „sjúklingar“ sem komu úr röðum unglingadeilda. Kvennadeildirnar Þórkatla og Dagbjörg sáu svo um að mannskapurinn fengi næringu á meðan á æfingunni stóð.

28/09/2009 -  Frétt thorbjorn.is Heimasíða björgunarsveitarinnar hefur legið niðri í nokkra daga vegna smávægilegrar bilunar og sá póstur sveitarmeðlima sem endar á "@thorbjorn.is" hefur því ekki borist og er sendendum bent á að senda mikilvægan póst aftur til öryggis.

15/09/2009 -  Frétt Kynningarfundur Miðvikudaginn 16. September klukkan 20:00 verður haldinn kynningarfundur um starfsemi björgunarsveitarinnar í björgunarsveitarhúsinu að Seljabót 10. Björgunarsveitin Þorbjörn býður alla velkomna sem hafa áhuga á að starfa með sveitinni á næstu misserum. Á fundinum verður kynnt dagskrá vetrarins og spjallað um verkefnin framundan. Heitt kaffi verður á könnunni og eins og fyrr segir eru allir velkomnir.

06/06/2009 -  Frétt Óhapp í Grindavík Eitt af björgunarskipum Slysavarnafélagsins Landsbjargar var í dag statt við bryggju í Grindavík þegar það óhapp varð að skipið sigldi stjórnlaust af stað. Gangsetning skipa fer fram í vélarrúmi og fyrir hana var farið yfir stjórntæki í brú og voru þau eins og vera skyldi. Þegar skipið var hins vegar gangsett fór það á ferð og sleit sig frá bryggju. Björgunarsveitamenn sem staddir voru á bryggjunni sýndu mikið snarræði með því að stökkva um borð og náðu þeir tökum á skipinu og forðuðu með því slysi því í höfninni voru fleiri bátar á siglingu, m.a. með börn. Einnig var mikið af fólki á bryggjunni sjálfri þar sem nú fer fram hátíðin Sjóarinn síkáti í Grindavík. Við skoðun á búnaði skipsins eftir atvikið kom ekkert fram sem gefur ástæðu til að ætla að stjórntæki hafi verið í ólagi. Líklegast er talið að einhver óviðkomandi hafi átt við þau þar sem mikill gestagangur var um borð í skipinu. Eru allir þeir sem atvikið snerti beðnir velvirðingar. Björgunarsveitin Þorbjörn, Grindavík Björgunarsveitin Suðurnes, Reykjanesbæ Björgunarsveitin Sigurvon, Sandgerði

05/04/2009 -  Frétt Aðalfundur Sæl öll, Aðalfundur Björgunarsveitar, Slysavarnardeildar og Björgunarbátasjóðs verður haldinn 9.júní. kl.18:00 Dagskrá fundarins eru hefðbundin aðalfundarstörf auk þess sem boðið verður upp á léttan kvöldverð. Hvetjum alla til að mæta.

05/04/2009 - Útkall Slasaður sjómaður sóttur Rétt eftir kl. 08 í morgunn barst Björgunarskipinu Oddi V. Gíslasyni annað útkall sem var að sækja slasaðan sjómann um borð í fiskiskip rétt undan Reykjanesi.

04/04/2009 - Útkall Útkall F-1 Rauður vélarvana skip 1 mílu frá landi við Krísuvíkurbjarg Björgunarskipið Oddu V. Gíslason að koma staðinn. Hraðbjörgunarbáturinn - Árni í Tungu kominn á staðinn. Myndir: LHG  Um klukkan 13:00 í dag var Björgunarskipið Oddur V. Gíslason frá Grindavík kallað út ásamt björgunarsveitinni Þorbirni vegna vélaravana báts um 1 sjómílu frá Krísuvíkurbjargi. Báturinn sem heitir Kristbjörg HF 177 er 290 brúttótonna línubátur sem var á veiðum á svæðinu. Um 5 mínútum eftir útkall var björgunarskipið Oddur V. Lagt af stað og stuttu eftir það fór Hraðbjörgunarbáturinn Árni í Tungu af stað líka. Þar sem báturinn var tæpa 1 sjómílu undan Krísuvíkurbjargi var ákveðið að kalla út Björgunarsveit Hafnarfjarðar líka þar sem þeir þekkja bjargið manna best. Þá fóru bílar og sexhjól úr Grindavík líka áleiðis með fluglínutæki ef á þeim þyrfti að halda. Tæpri klukkustund eftir að útkallið kom voru um 20 manns komnir á bjargbrúnina ásamt því að bátarnir tveir, Oddur V. Og Árni í Tungu voru komnir að skipinu. Þá voru þyrlur Landhelgisgæslunnar sestar á bjargbrúnina líka og biðu átekta. Rétt fyrir klukkan 15 komst Kristbjörg HF svo í gang og gat siglt fyrir eigin vélarafli og var þá öll aðstoð afþökkuð. Að aðgerðinni komu 35 manns frá Grindavík og Hafnarfirði.

Vertu vel undirbúinn ! Björgunarsveitin Þorbjörn hefur hafið sölu á frábærum undirfatnaði frá norsku fyrirtæki sem heitir Ullmax. Nánari uppls. er að finna hér.