Togarinn Skúli fógeti strandar við Staðarhverfi 1933.

Laust eftir miðnætti aðfaranótt hins 10. apríl 1933, í kafaldsbyl og austan hvassviðri, strandaði togarinn ´Skúli fógeti´ vestanvert við Staðarhverfi í Grindavík. Strax eftir að skipið strandaði, var sent út neyðarskeyti. Heyrðist það í loftskeytastöðinni í Reykjavík, er náði fljótlega sambandi við togarann ´Haukanes´, sem var á Selvogsbanka, og fór hann þegar áleiðis til strandstaðarins. Einnig gerði loftskeytastöðin Slysavarnafélagi Íslands aðvart um strandið. Reyndi erindreki félagsins þegar að ná sambandi við Grindavík, en tókst ekki. Var þá lagt af stað frá Reykjavík til Grindavíkur í bíl, en það reyndist ófært vegna fannkynngi og kafaldsbyls, er var svo dimmur, að ekkert sást fyrir veginum. Þegar veðurfregnum var útvarpað kl. 1:40 hugkvæmdist þeim manni, er vörð hafði á loftskeytastöðinni Í Reykjavík, að segja frá strandinu. Fékk símstjórinn í Grindavík á þann hátt vitneskju um það, sem skeð hafði. Tilkynnti hann það samstundis formanni slysavarnasveitarinnar á staðnum, Einari Einarssyni í Krosshúsum. Brá hann skjótt við og lét kalla saman björgunarlið. Var því næst haldið af stað til að leita hins strandaða skips, sem menn vissu ekki örugglega hvar var. Kl. Var þá um 3:00. Lagði björgunarsveitin af stað í bílum og hafði með sér línubyssu með tilheyrandi skotlínum, líflínu, tildráttartaug og björgunarstól. Einnig var farið með eldflugur, luktir, lýsi o.fl. Sökum fannkynngi og mjög erfiðar færðar komst björgunarliðið ekki á strandstaðinn fyrr en kl. rúmlega 5:00. 1)